FERRARA DI MONTE BALDO
Popolassion: 188; Altessa: 856 metri sora el livel del mar; Superfice: 26,91 chilometri quadri; Comuni confinanti: Brensòn (Brenzone), Malsésen (Malcesine), Brentìn (Brentino-Belluno), Cavrìn (Caprino Veronese), S.Zen de Montagna, Avio TN
Ferara l’è posissionada sul versante oriental del Monte Baldo, in una conca, quasi a mesa costa tra la Val d’Adese e le çime del Baldo. Ne la val, querta da magnifiche distese de conifere, spunta fora qua e là, le case residensiali par el turismo come i vilai Alpin, Albarè e Monte Cuco, sensa contar le contrade Cambrigar, Campedel, Casteleti, Dossi, Fraine de Sora e Fraine de Soto, Mezavila e Portole. El nome de Ferara el deriva dai giaçimenti de fero che i romani i sfrutava ne la val. Ma le origini de Ferara i è ancora più antiche, se pensa che la prima forma de insediamento abitativo stabile el se sia verificado nel momento del passajo fra la condission nomade e quela d’agregassion de ci se ocupa del bestiame e de l’agricoltura qualche milenio prima de Cristo. Nel VI secolo el teritorio l’è passado soto i Longobardi e un secolo dopo ai Franchi. Sul Monte Cuco i dise sia stà costruida un fortificasion "arce" par difendar i abitanti da le invasioni barbariche. Nel 1193 deventa comune con sede in Saugol, poi in Campedel e infine ‘ndoe l’è atualmente. El so teritorio par la so importansa strategica e aministrativa l’era stà incluso ne la “fatoria scaligera”, cioè fra i teritori aministradi diretamente dai Scaligeri. Da documenti risulta che Ferara zà nel '500 l'ospitava viandanti e foresti, dimostrando una bela vocasion turistica. Storicamente nel 1703 da Ferara, l'era partido el Duca de Vendòme con quindesemila omeni in diression de la çità de Trento nel tentativo, poi falido de conquistarla. El paese l'è stà ocupado nel periodo 1796-97 da eserciti francesi e austriaci che alternandose con vitorie, sconfite e sparatorie i à messo soto sora el paese e infine concluse con la conquista final de Napoleon dopo la vitoria de Riole. Nel 1813 i francesi i vien messi in fuga da l'esercito austriaco comandado da Eugenio de Beauharnais e costreti a ritirarse oltre el Mens (Mincio). Nel dugno 1848 le fa la so comparsa anca le trupe piemontesi, che dopo essarse ben difese contro quele austriache, un mese più tardi le vegnarà definitivamente sconfite. De questo evento storico gh'è 'na testimoniansa a Malga Basiana dove gh'è un çimitero "Le Buse dei Morti" non molto grando, con i resti de çinque soldà de l'esercito piemontese e de tri de quel austriaco. Ne la prima guera mondial el teritorio de Ferrara l'è stà percorso da diversi reparti militari che i andava in diression Monte Altissimo e Brentonico. In questo periodo el paese e i pascoli de le malghe, jè stà zone de acantonamenti militari, con conseguente interusion de tute le normali atività economiche. Ne la zona de Novesa (Novezza), a çima Redute e in tuta la zona tra Cerbiol, e Gambon se pol ancora 'edar le longhe trincee realisade da le truppe italiane. Jè particolarmente interessanti quele de Novesa, 'ndoe se pol individuar varie struture de servisio e quele de Gambon, scavade a tunel ne la piera viva e paurosamente in fora e a strapiombo su la Valdadese. Sempre a testimoniansa de la presensa militar italiana durante la Grande Guera l'è una fontanela d'aqua su la strada tra Saugol e Ime, con sora scrita la data 1917. In località Peagne inveçe, se pol visitar el Sacrario Provincial de i "caduti" veronesi de tute le guere con 98 lapidi messe a semiçercolo, una par ogni comune veronese. Da visitar l'è la Césa parochial de Santa Caterina d'Alessandria, zà parochia nel 1460, dipendente da la Pieve de Cavrin (Caprino). La césa originaria, de la qual i resta l'abside e un çiclo de afreschi, l'era stà ampliada ai inisi del 1600. Vissin a ela, nel'Otoçento, l'è stà realisada quela atual su disegno del'ing. Don Angelo Gottardi: i laori i era inissiadi nel 1870 e ultimati nel 1888; el 24 dugno del stesso ano la noa césa l'è stà benedeta e 'l 9 lujo 1898 consacrà. I magnifiçi afreschi del presbiterio jè del Trentini, mentre i altri del Saoncella. La portesela del tabernacolo l'e' impreziosida da un' "Ultima çena" del pitor setecentesco G.Battista Lanceni. Le tri campane jè del 1846. Nel teritorio de Ferara, da visitar assolutamente l'è el Santuario de la Madona de la Corona che parò se ragiunge da la frassion Spiassi del Comune de Cavrìn. El santuario più "ardito d'Italia" el se cata tacà via a le rocie a strapiombo su la Val d'Adese e rifato più 'olte nel corso dei secoli con l'atual fasàda de fine '800. El simbolo l'è una "Pietà" de marmo con la Madona col Cristo morto sui zenoci. La statua la presenta una scrita "Hoc opus fecit fieri Ludovicus de Castrobarco A:D. 1432" mentre secondo la tradission l'è sparida nel 1522 da l'isola greca de Rodi, durante 'n ataco dei turchi e ricatada li' tra i sassi del Baldo. Documenti storiçi i dise che nel logo "de la Corona" ancor prima de l'arivo de la statua gh'era dei eremiti benedetini. La césa l'è stà sgrandada 'isto l'alto numaro dei pelegrini da tuta Italia e nel 1985 da segnalar la visita de Papa Giovanni Paolo II. Da visitar l'è anca l'Orto Botanico de Novesina (Novezzina) denominado "Hortus Europae". Chi, se pol catar una varietà ecessional floristica e floreale con esemplari de fiori uniçi nel mondo come la Anemone baldense, Galium baldense, Knautia baldensi. Infine da segnalàr che da Ferara parte numarosi sentieri che i porta a çime e località del Baldo come çima Telegrafo (2200 m), çima Valdrita (2218 m), Coalsanto (2075 m), Ponta de Naole (1659m) el Valon Osana, Malga Artilon, (1538 m), Passo del Cerbiol (1379 m), Caval de Novesa, Passo Campion. Foto: Césa de Parochial dedicà a Santa Caterina d'Alessandria
- Il tartufo nero del Monte Baldo 
